Psa 2 | KYC | STEP | Akipamo yuu muu dupwana wambu dupwame Kamongopa sisu nyuo karo yulu koo lapo pinya lao suu pyao rapa rapa piminyipape angi kapa pii nalyamisi?

Psalms 2

Anatunya Rombo Palyisi Kiŋi

1 Akipamo yuu muu dupwana wambu dupwame Kamongopa sisu nyuo karo
yulu koo lapo pinya lao suu pyao rapa rapa piminyipape angi kapa pii nalyamisi?
2 Nakamana kiŋi dupwa porai ingyuo karo
dee akali mupwa dupwa wato lao karapala
Kamongope banya rombo palyisi kiŋi dokope yanda pimwailyaminyi.
3 Nakambame namwa isilyambinyi doko iso kara nanale ramanyi nembamana, letaminyi.

4 Kamongome yake panda banya kiŋinya petenge isa dokona piso
nakama kopyali ingyuo pimana lao karaminyi dupwa kandapala giyalya giyana pingi.
5 Baame nakama imbu singi paleta repe repe pii lamaiyuo dokopa
nakama pakanya pyambuo lao,
6 Nambana yuu kyau poo pyasi Sayone lenge dokona
nambame nambana kiŋi doko rombo palyuo karena lamaipu, letamo.

7 Kiŋi dokome lao, Kamongo dokome lapyamo pii dupwa nambame polo larole.
Baame namba langyuo, Emba nambana ikinyingiŋi.
Epapu dakepa namba embena rakange ingyuo karoŋo.
8 Piso serene dokopa yuu muu dupwa emba jeronopa
peparae embena ingyuo para.
9 Embame ane pangalimi pyao kambo
dee nakama pee warame wasisi pyao kambele lao piri, lapya letamo.

10 Dakepa nakama kiŋi dupwa repe repe pii dake selapape.
Wambu iso karenge akali nakamame kale yukupala doko mende lalyane lao mana nyelapa.
11 Kamongo baa mupwa lao suu pyao pako banya yulu pyakamyuokaralapape.
12 Baa mupwa lao mona nembo karo kingi wapambu lakao mona maipape.
Dopa pii narami ramo banya imbu singi waiya lao sipuraramo dokopa
nakama aopa kumarami.
Dokona baa keta mata kui lao kararamidupwa rae mairami ingilyamo.